奇妙電視《放試》
盧海鵬街市試咪 「三嫂」戚美珍趁機買平餸
一樣米養百樣人,奇妙電視街頭實測節目《放試》由盧海鵬率領趙海珠、林小珍、李尚正、簡采恩及鄺家銘主持,拆解香港人各種人性特點及缺憾,包括貪小便宜、自私功利及以貌取人等……節目走上街頭,設計多個模擬場景,以隱蔽鏡頭揭露港人真正特質。今集主題「先入為主」。

《放試》今集由鵬哥帶頭去街市試咪,「三嫂」戚美珍專程來捧場,兩人老友鬼鬼,齊齊行街市,「三嫂」更乘機買了包括海鮮的平餸,返屋企煮番幾味,氹下「三哥」及仔女;「三嫂」約鵬哥下次再行街市,更應承請埋鵬哥一齊食。

「粉絲」跨區來撐場 鵬哥乜都無難度
現在的新式街市設備乾淨企理,更常駐街市DJ,每天與商戶洽談推廣街市內商品,然後重點推介給街坊。鵬哥去到街市試咪,效法街市DJ,揸住支咪,分別到水果檔推介蘋果、魚檔推介鯪魚肉及凍肉檔推介鹹豬手等,鵬哥人生經歷豐富,梗係話無難度,且所到之處,街坊與師奶亦步亦趨,更有「粉絲」跨區專程來到撐場,每次推介後幾分鐘便賣晒鵬哥推介的餸菜。

玩遊戲 鵬哥好靚仔 「三嫂」都話學到野
鵬哥與「三嫂」更邀請街坊玩有獎遊戲,即場送禮;一位女小學生唸「廿蚊一斤雞,廿蚊一隻龜,你話雞貴定龜貴?」的急口令,另一位師奶參加創意打油詩,即場唸出第一句「鵬哥好靚仔」,Joyee 簡采恩及「阿占」鄺家銘立即接上「三嫂靚到底」及「奇妙最好睇」,串連起來都幾呷韻,結果兩名參加者各獲鮮雞一隻,即晚可以開大餐!

街市駐場DJ示範「桃膠紅棗鮮奶糖水」,十幾分鐘便煮到美味滋補糖水,大派街坊之餘,「三嫂」都話學到野,回家後一於照跟著來煮,嚐美食兼補下。