奇妙電視《天下第一Friend》
徐濠縈大談與陳奕迅婚變傳聞無避忌
被指大花筒婆媳不和 徐濠縈大平反
徐濠縈為經理人兼好友鄭紹康打響頭炮,亮相奇妙電視「天下第一Friend」接受Francis訪問,阿徐由A餐B餐、婆媳不和以至和陳奕迅屢傳婚變等坊間傳聞一律有問必答毫不迴避,認真畀面!

阿徐淡然說:「成日話我地分手、離婚,慣晒啦,咪由得人講囉,時間係最好既證明,即管放長雙眼!」阿徐自言和Eason都是絕少睇新聞的人,更加不會將坊間傳聞拿作茶餘飯後話題。阿徐續謂:「好似A餐B餐咁,到依家我都分唔清自己係A餐定B餐,是但啦,至緊要係佢(指陳奕迅)揀岩左自己果個餐,佢岩食咪得囉!」

至於傳聞她下嫁Eason時,陳家曾大力反對,即時嫁入陳門,婆媳關係仍然惡劣?阿徐聞言掩嘴笑道:「我地結婚果陣,米已成炊,包包(二人的愛女)都已經歲幾啦,仲反對?而且我同奶奶關係好好,佢成日買小禮物畀我,又會帶朋友來鋪頭幫襯,咁我當然唔敢收佢錢啦,哈哈!」

其實屢傳阿徐和Eason不和的主要原因是指阿徐大花筒,阿徐聞言打趣說:「咁要問陳奕迅啦!其實我又唔鍾意買珠寶,又唔買名車,如果以強中弱來厘定大花筒,我只係適中囉!當然每個人把尺都唔同,至緊要係身邊果個(指Eason)唔覺得你過份!」阿徐頓一頓笑道:「可能佢仲大使過我!」

阿徐回想當年跟Eason在華星年代認識,當年Eason寂寂無名,今時今日則已成為歌神,阿徐笑道:「有時我地都會攞返來笑下,依家無名果個係我,我只係Eason嫂!」阿徐最窩心是當年還在無綫時,因為太不喜歡做娛樂圈,Eason好型地對她說:「你撈唔掂架啦,等我來啦,趁仲未搬入將軍澳,好走啦!」阿徐爆笑說:「果年我27歲,就咁息左影!」