奇妙電視《那些年‧娛樂巴巴閉》 
暢談八十年代影圈最輝煌時刻 吳耀漢拍一部戲買一幢別墅
吳耀漢、林超榮和田啟文作客奇妙電視「那些年‧娛樂巴巴閉」節目,跟主持鄭啟泰、翟浩然和Kawaii暢談80年代影圈最輝煌的時候,當年香港有「東方荷里活」之稱,年產近3百部電影,因此不時發生舞刀弄槍搶奪演員事件,林超榮坦白指周潤發、劉德華和李連杰都分別被搶過!

林超榮稱:「嗰時真係好瘋狂,成日攞支槍出來搶人,劉德華試過啦,周潤發因為咁拿拿聲簽左金公主(電影公司),大樹好遮蔭呀嘛!成龍拍「師弟出馬」時畀人挾左1日,走去拍「醒拳」;李連杰拍「黃飛鴻2」又畀人挾過!佢地紅呀嘛,紅就係咁架啦!」當年鄭裕玲和吳君如分別有「鄭九組」和「吳君九」之稱,同時兼顧9部電影拍攝。

吳耀漢也試過「吳三組」的滋味,他無奈說:「嗰時唔拍即係唔畀面,我都好身不由己!」田啟文附和道:「嗰時無幾組戲在身,即係渣,渣就無人用架啦!」吳耀漢原本片酬60萬,後來簽約德寶(電影公司),片酬高達100萬,吳耀漢笑道:「嗰時100萬可以買1棟3層高別墅,我拍1部就買1幢,結果拍左11部!」田啟文搞笑說:「咁吳嘉龍咪好穩陣?富二代來喎!」

影業輝煌有賴幕後功臣,吳耀漢最難忘當年的新藝城7人組,他數道:「麥嘉、徐克、石天、施南生、泰迪羅賓、曾志偉、黃百鳴,佢地開會度橋間房被喻為「奮鬥房」!」林超榮試過問麥嘉如何度橋,對方表示會安排編劇四出參觀影展偷橋,林超榮笑道:「電影「聖誕快樂」咪咁來囉,度度抄啲堆砌合成,「奇謀妙計五福星」都係抄返來架!」