奇妙電視《奇妙娛樂新聞》 
88年亞姐亞軍曾小燕 淡出娛圈成為澳門賭場「大家姐」
88年亞洲小姐亞軍曾小燕參選期間因被偷拍露毛照而名嘈一時,淡出娛圈後她已定居澳門並成為賭場「大家姐」,最近小燕接受奇妙娛樂新聞主持鍾煒喬訪問,重提當年不雅事件的心路歷程,她坦言:「當時真係接受唔到,好唔開心,喊左好耐,連街都唔想去,因為唔知點面對大眾眼光!」

當年事件發生在旗袍環節,小燕稱:「著旗袍係要顯現身形美態,我唔想內褲摺痕令自己失色,所以真空上陣,點不知咁岩有陣風吹起件旗袍,又咁岩畀傳媒影左相仲做埋雜誌封面,真係轟動一時!知名度係提高左,但有邊個女仔希望用私隱去換取知名度,所以嗰段時間我真係好唔開心!」

尤幸小燕得到家人體諒,甚至後來接拍性感戲,家人都予以支持,小燕說:「條路係自己揀既,屋企人覺得我只要承擔到就得啦!況且嗰時影圈以拍性感戲為主,搵我拍既戲來來去去都係嗰啲,拍得多自己都覺得發揮唔大,最後選擇離開!係咪心灰意冷?絕對係啦!」

退出娛圈後,小燕返回澳門,未幾認識了前夫,拍拖一年即生下兒子Miko,為生計,她選擇從事賭場賬房工作。小燕說:「在賭場工作算係高薪厚職,做左年幾,覺得自己在賬房要學的已學晒,咁岩公司覺得我可以勝任公關,所以就轉左做公關!」

在賭場工作近廿年,小燕由低做起,現時主要打理貴賓廳,見盡「贏開巷」和「輸身家」的人,所以她從不沾賭,至於有無兼營「副業」?她笑道:「副業咪搏賭客畀小費囉,我都試過收10萬、20萬小費,要令賭客開心,就要知道「灶忌」,例如客人唔鍾意見梳,因為「梳」國語發音似「輸」,做公關就要識做囉!」