奇妙電視《天下第一Friend》
袁詠儀自認口不擇言 坦言:我把口快過個腦!
袁詠儀承認是個口不擇言的人,最近她接受鄭紹康為奇妙電視主持的「天下第一Friend」節目訪問時,再度爆料指「四條廢柴愛打牌」!誰是四條廢柴?靚靚至愛張智霖當然榜上有名,其次包括郭富城、沈嘉偉和一位圈外朋友「大哥」!

靚靚笑爆嘴說:「點解叫佢地廢柴?因為佢地玩起上來真係好廢!譬如Chilam今日同我講:今晚去打牌呀!我問佢:點解呀?佢答:阿王(指郭富城)聽日走啦!到左聽日,Chilam又同我講:今晚去打牌呀!我問佢:點解呀?佢答:阿王(指郭富城)返來啦!你話廢唔廢?」

鄭紹康好言相勸:「打牌總好過花天酒地呀!」靚靚承認說:「所以我咪由得佢去囉,至緊要識得返屋企,好似沈嘉偉咁,打到三叉神經線發炎先肯返屋企,哈哈!」靚靚指這四個男人的友誼建立了超過廿年,平時各有各忙各自在事業上拼搏,但一有時間聚首打牌,就玩到好廢!

靚靚不但口不擇言,還目中無人,最近她便被爆當年曾得罪成龍和王晶,靚靚坦言:「以前哥哥(張國榮)同梅姐(梅艷芳)都話過我,哥哥仲話:花無百日紅,要我檢點啲,但我把口硬係快過個腦!」Chilam熟知她脾性,為免她在不適當的場合爆出不適當的話來,有時會捉到她實一實,靚靚笑道:「老公都怕左我!」

靚靚和Chilam結婚十六年,已是圈中公認的恩愛夫妻,被問到如何將感情保鮮?靚靚分享說:「至緊要唔好覺得理所當然!如果對方要變,肯定自己都有問題,所以要積極求進步,唔好做一個被嫌棄既人!」靚靚舉例說:「好似我依家唔拍戲,但我會去了解周邊發生緊咩事,同老公傾偈就可以有說不完既話題!」

最近靚靚少了工作,她透露原因說:「年頭拍完內地節目後,魔童唔知點解變得好黐身,成日問住我地在邊、幾時返屋企,所以Chilam叫我唔好做野,陪多啲個仔!」Chilam負責搵家用,靚靚負責陪魔童,然則財政如何分配?靚靚大笑道:「我地財政好獨立架喎,獨立到我好少用自己既錢囉!」

今時今日Chilam已是男神,財來自有方,但當年他和靚靚拍拖時,卻被指「女尊男卑」,靚靚承認說:「以前我都成日聽到有人咁話佢,但我記得一句說話:寧欺白鬚公,莫欺少年窮,每個少年都有佢既機會,依家證明我無買錯呢隻藍籌啦!」Chilam何止是藍籌,還是優質大藍籌哩!