奇妙電視《天下第一Friend》
黎明唱歌風格轉變 雷頌德苦笑被誤會
雷頌德(Mark)和太太梁家玉(Jade)作客鄭紹康為奇妙電視主持的「天下第一friend」節目,身為天王黎明御用音樂總監的Mark,對於不少人誤會黎明由情歌轉唱快歌是拜他所賜,Mark聞言苦笑說:「黎明係無人叫得佢郁架,所有野都係由佢自己出發!」

Mark解釋說:「當年黎明去左韓國一轉,返來同我講要唱快歌!我心諗:快歌,我拿手啦!點知寫畀佢,佢話:都跳唔到舞既,聽左都唔想郁,最後佢捉左我去韓國兩個禮拜!」Mark回想那段日子,日日去不同夜店觀摩,他說:「黎明要我觀察,到底播咩歌先會令人跳舞,果次真係一個好好既經驗!」

Mark讀土木工程出身,卻改行音樂路,他戲稱是怕萬一做音樂賺不到錢時,還有工作可做。正如早年他和馮德倫組成Dry,最後分道揚鏢,Mark笑道:「咪就係因為無錢賺囉!個個都叫我地去唱,但個個都唔畀錢,免費唱,喂,我件件衫都好貴架,無回報做來做乜?唔好嘥時間啦!」

至於Jade是模特兒出身,同Mark本來風馬牛不相及,結果因為一次拍戲而戀上。 Jade笑道:「我地都幾同聲同氣,性格好接近,又熱愛家庭!」Mark認同說:「Jade成個男人咁,又同我一樣駕電單車!」鄭紹康問Jade當年帶著一名兒子下嫁Mark時有無顧慮?

Mark抵死地搶答說:「都咁老囉,仲有咩顧慮呀?」Jade白他眼道:「當時我得廿幾歲,你係咪想死呀!」Jade指Mark是個愛屋及烏的人:「真係唔可以唔嫁畀佢!」Mark不諱言:「我都係單親家庭長大,自細跟住媽媽,所以我好清楚Jade既情況,亦好明白作為一個後父既責任!」

訪問期間,Mark和Jade不時頂嘴,但恩愛之情卻溢於言表,Mark笑道:「唉,我地日日都嗌交架!」Jade補充說:「我地無隔夜仇囉!」Jade和Mark婚後再誕下二子,作為三子之母,鄭紹康大讚Jade保養得宜,依然好「得」,Mark在旁搞爛gag說:「佢好得,因為佢嫁左畀雷頌德!」講完自己都忍俊不禁。