奇妙電視《天下第一Friend》
謝賢為霆鋒離婚落淚  坦言好錫張栢芝
謝賢曾感慨表示想不到兒子謝霆鋒會跟自己同樣走上離婚之路!日前謝賢作客鄭紹康為奇妙電視主持的「天下第一Friend」節目訪問時,談及此事不禁哽咽道:「呢個係我孤獨老人既創傷,每時想起都難免落淚!」

四哥和狄波拉結婚25年後離婚,鄭紹康問他此事對霆鋒有無影響?他不以為意說:「應該無!我地決定離婚前有徵詢過仔女意見,霆鋒好潚洒,佢好贊成我同拉姑做返朋友,所以就算有影響,佢應該都識處理!」

四哥坦言好喜歡霆鋒一家,尤其是張栢芝。他說:「我成日同人講我好錫呢個新抱,因為佢幫我生左兩個孫,有咩好得過畀兩個孫我呀,係唔係?」問四哥有無和王菲見面?他笑笑道:「呢樣唔理啦,霆鋒從來唔會問我識咩女仔,我地屋企唔興問呢啲野!」

正如四哥也從來不過問婷婷傳和「鷹眼」拍拖,他笑道:「番鬼佬!佢鍾意就得,一世人幾廿年,至緊要開心!」四哥近期最開心莫過於獲霆鋒送贈八千萬豪宅,不過他在人前卻扮平常說:「唔通要我跪係度多謝佢咩?梗係扮潚洒啦!不過我心裡面果句係:我無生錯呢個仔!」

四哥自嘲是個「不知所謂」的爸爸,管教霆鋒和婷婷,從來是狄波拉的事。四哥形容說:「拉姑係賢妻,但唔係良母,因為佢好嚴厲!」四哥和拉姑最教人嘖嘖稱奇的是他們離婚後依然是好朋友,四哥甚至和拉姑現任老公的關係都不俗。

四哥認同說:「有次拉姑駕車來接我,佢老公都有來,仲坐係前座。我一上車就同佢講:坐返後面,我係前夫梗係坐前面啦!」不說不知,當日四哥和拉姑辦理完離婚手續後,二人竟在街上擁抱起來!四哥笑道:「因為太開心,我仲抱住佢轉左三個圈,睇到我地雙方律師都呆左,哈哈!」

除了拉姑,四哥還細數他生命中的四個女人說:「第一個係嘉玲(息影女星),同佢失敗左,係因為當年我太貪玩,因為細個無錢,後來有錢咪出去喪玩囉,玩到有日佢突然同我講要結婚,然後就嫁左去泰國!」

蕭芳芳係四哥第二個女朋友,四哥愛惜地說:「芳芳好乖,係我決定要離開佢既!因為有日佢提議我去學英文,我心諗,我連玩都唔夠時間玩,你仲要我去學英文?不過我從而知道佢係個好女仔,咁我就唔好害人啦!最後決定退出,我覺得自己做左件好偉大既事!」

四哥和甄珍的結合是在光藝年代,二人拍拖四年,結婚一年便分手。四哥回憶說:「簽左離婚紙後,我駕車上左山頂喊左15分鐘,然後我同自己講:講左去啦,唔好再諗,然後就放低左!」

至於四哥和現任女友Coco拍拖已逾10年,四哥坦言不會再婚說:「名份係假架!兩張婚書我都撕爛左,仲結來做乜!況且我都80後啦,所以我同佢講,遇到個好既就走啦!」四哥真係好豁達,亦好坦白,鄭紹康笑問他今時今日是否還「有心有力」?他朗朗大笑道:「依家有心多啲!哈哈哈,呢樣野無得認叻既!」